Old Testament

Mambo we Aramu Bhenihadadi kakubunganya babhayani babe bose, kabhatshiwa ne bamwe bomambo bali makumi matatu ana bali babili nge mbizi nenge koloyi dze ngwa. Ngono kabhuda kunonginilila Samariya kugwa nayo.

Katuma batumwa mu nzi nkulu kuna Ahabu mambo we Iziraela kunon'dwa beti, “Bhenihadadi kati,

‘Siliva iyo ne golide iyo nge zwangu ne bakadzi bose bakanaka nenge bana nge bangu.’ ”

Ngono mambo we Iziraela kashandula eti, “Koga sekwa maleba tetshi wangu, mambo wangu, ndabe nthu wenyu na zose zwandinazo nge zwenyu.”

Batumwa bakazha kakale bakadwa Ahabu bakati, “Bhenihadadi kati ndakazhisa dama kuti undizhisile siliva iyo ne golide iyo ne bakadzi babo ne bana babo.

Ngono ngwenu, mangwana nge tjibaka itjetji, ndowotuma hadzasha dzangu, kuwofunyungudza mu ng'umba iyo ye bumambo nemu ng'umba dze balanda babo, ngono banowotola tjimwe ne tjimwe tjinowobe tjibagutsha.”

Ndizo mambo we Iziraela kadana sholotjena dzose dze shango kabadwa kati, “Bonani nlume iwoyu sekwaanoshaka phipiti ndiko, ngoti wakanditumila batumwa eshaka bakadzi bangu ne bana bangu ne siliva yangu ne golide yangu, ngono asitongo lambana naye.”

Ngono sholotjena dzose ne bathu bose bakashandula mambo beti, “Musitongo gala manteedza kene kuli kudumana naye.”

Ndizo Ahabu kadwa hadzasha dza Bhenihadadi kati, “Mudwe tetshi wangu mambo wangu muti, ‘Zose zwamakashaka mu nlanda wenyu kutanga ndowozwithama, koga ezwi andingazwithame.’ ” Batumwa bakamilika bakabgwiliza shandulo kuna Bhenihadadi.

Bhenihadadi kabgwiliza batumwa kunodwa Ahabu beti, “Midzimu indilobe ipaphulula, ha kungabe ne limbelimbe lingawanika mu Samariya lili mu maboko e bathu bose bakandisala shule!”

Mambo we Iziraela kashandula eti, “Mudwe Mambo Bhenihadadi muti, ‘Nthu unotola zwibhayano eyenda ku ngwa aatozwikudza se unozwitula edwa kungwa.’ ”

Kukati Bhenihadadi ewha thawu idzedzi bali mu mishasha beng'wa ana bamwe bomambo, kadwa babhayani babe kati, “Tolani zwibhayano munogwa.” Ngono ibo bakatola zwibhayano kunonginilila nzi nkulu.

Ngono bonani, nlebesambeli kazha pana Ahabu mambo we Iziraela kandwa kati, “Yahwe banolebeleka beti, ‘Apa wabona bunjinji igogu gusibushoma kene? Bona, nasi ndogulonga mu luboko gugo, ngono unowoziba kuti ndimi Yahwe.’ ”

Ahabu kabhuzwa eti, “Ndiani unowotungamilila ngwa?” Nlebesambeli kashandula eti, “Yahwe bakati bazhuzha be babhayani ba pasi kwe balauli be mituthu banowoyenda ku ngwa.” Mambo kabhuzwa eti, “Ndiani unowonotanga ngwa?” Nlebesambeli kadabila eti, “Ndimwi mambo?”

Ndizo mambo kadana bazhuzha be babhayani bapasi kwe balauli be mituthu bali mazana ali mabili ana makumi matatu ana bali babili (232). Pezhugwi kwabo kadana babhayani be Iziraela bali zwiwulu zwili kutendeka (7 000).

Babhayani bakabhuda zhuba lili mpani, koga Bhenihadadi na bomambo bakabe bashingidzana naye bakabe bali mu mishasha beng'wa belaladza.

Babhayani bakabe bali pasi kwe balauli be mituthu bakatanga bhuda. Ngono tjeti dze babhayani dzakabe dzadusiwa ndi Bhenihadadi dzikazha kuwonzibisa dziti, “Kuna bathu banobhuda mu Samariya bezha ngeno.”

Mambo kadwa tjeti kati, “Ha bezha kowoshaka mbakiso, mubaamutjile bali bapenyu, nenguba bangabe bezha nge ngwa mubaamutjile bali bapenyu.”

Koga bazhuzha be babhayani bakabe bali pasi kwe balauli be mituthu bakasagwa shule nge babhayani be Iziraela bakabe babhuda kale mu nzi nkulu.

Mmwe ne mmwe kabulaya waakalingisana naye. Basiriya bakatizha, Baiziraela bakatatana nabo, koga Bhenihadadi mambo we Aramu akatatha mbizi kasiya ana bamwe batathi be mbizi.

Mambo we Iziraela kalobesa Basiriya banjinji kwazo, ebuya etapa mbizi ne koloyi dzabo dze ngwa.

Shule kwa ipapo nlebesambeli kayenda kuna Mambo Ahabu kandwa kati, “Bgwilila, unozwilulwamisa, ubone kuti babhayani babo bamile zubuyanana, ngoti mu tjilimo tjinozha mambo we Aramu unowobe ezha kuwokunginilila.”

Hadzasha dza Bhenihadadi dzikandwa dzikati, “Midzimu ye Baiziraela midzimu ye matombo, ndizo bakatikunda, koga ngati gweni nabo mu mabala, nge malebeswa towobakulila.

Thamani sawhoku, dusani mambo mmwe ne mmwe mu mamo awe, mube mulonga balauli be ngwa mu mamo abo.

Mube ne babhayani bangapa ibabaje bakamulashikila, nenge mbizi ne koloyi dze ngwa na idzobo.” Mambo kateyedza gumbuludzo le hadzasha dzidze kathama sekwa baleba.

Kukati mu nsi we nyawuko Bhenihadadi kululwamisa Baaramu kunogwa ndizo kayenda ku Apheke kunogwa ne Baiziraela.

Baiziraela bakati basinolulwamisigwa kugwa bapiwa ne mbuba, bakayenda kunogwa ne Baaramu. Ngono bakabe bali bashomanana benga ngubi mbili dze mbudzi mbeli kwe Baaramu, koga Baaramu ibo bali zhele shango yose.

Ngono nlebesambeli we Ndzimu kasedzela kuna mambo we Iziraela kandwa kati, “Etji nditjo tjinolebgwa ndi Yahwe beti, ‘Ngoti Baaramu banoleba beti, “Yahwe Ndzimu we matombo usi we mabala,” ndowobalonga mu maboko awo ngono iwe ne bathu babo mowokunda babhayani ibaba be bunji gusibushoma, ndizo iwe ne bathu babo mowoziba kuti ndimi Yahwe.’ ”

Baaramu ne Baiziraela bakagala bakalingisana bamwe ne bamwe bali mu mishasha yabo kwe mazhuba ali kutendeka. Ndizo mu zhuba le butendeka ngwa ikatangisa, ngono Baiziraela bakabulaya Baaramu bali zwiwulu zwili zana (100 000).

Bakasala bakatizhila mu nzi nkulu we Apheke. Ngono luswingo gukabawila bali zwiwulu zwili makumi mabili ana kutendeka (27 000). Bhenihadadi naiyebo katizha kanobgwata mu ng'umba ishule mu nzi nkulu.

Hadzasha dzidze dzikandwa dzikati, “Bonani, takawha kuyi bomambo be Iziraela bana ngoni kwazo. Imani tizwisunge thunji nge saka, tipombe zwiambalo mu misholo tibe tiyenda kuna mambo we Iziraela. Pamwe unowoletja kumubulaya.”

Ndizo bakabe bezwisunga thunji nge jila le saka, bepomba misholo yabo nge zwiambalo, bebe beyenda kuna mambo we Iziraela beswika bendwa beti, “Nlanda wenyu Bhenihadadi unokumbila kuti musimbulaye.” Ahabu kadabila eti, “Apa utjatjilazwe kene? Ikamu tjangu!”

Hadzasha dza Bhenihadadi dzikayela njele kubona tjilakidzo tje buthu gwa Ahabu, ngono bakabe beti, “Tjoselele ikamu tjenyu Bhenihadadi!” Ndizo Ahabu kabe ebadwa eti, “Yendani munontola muzhe naye ngeno.” Kukati Bhenihadadi eswika, Ahabu kandwa kati atathe naye mu koloyi ye ngwa.

Bhenihadadi kadwa Ahabu kati, “Ndowomubgwilizila mizi yakabe yatolegwa tate benyu ndi tate. Mukazwithamila magalo anoshabila mu Damasiko tate sekwa bakathama mu Samariya.” Ahabu kashandula eti, “Sekwa wazwisunga, ndowokusunungula.” Ndizo kathama tjidumano naye kabe enletja eyenda.

Mmwe we badiyiwana be balebesambeli kadwiwa ndi Yahwe kuti adwe mmwe amphobole. Koga iwoyo nlume kalamba kumphobola.

Ndizo nlebesambeli kadwa nlume iwoyo kati, “Bona, sekwa walamba dama la Yahwe, kowoti tjinyolotjo udwa pandili, unowobulawa nge shumba.” Ngono kwakati tjinyolotjo ethubukana ne nlebesambeli kashangana ne shumba ikambulaya.

Ipapo kawana mmwe nlume kandwa kati, “Undiphobole.” Ngono nlume iwoyo kamphobola kandusa mbonje.

Ndizo nlebesambeli kamilika kayenda, kanomila mambo pa zila akazwipomba nge jila mu buso kuti asizibgwe.

Kukati mambo epinda nlebesambeli kan'dana eti, “Bonani, nlada wenyu, ndakati ndili mu ngwa, mbhayani kazha kundili ne nthu waakabe atapa kandidwa kati, ‘Lisa nthu iwoyu, ha kungashingikala kuti atizhe, unowofa mu bumo gugwe, kusajalo unolipa nge themba ye maloso e siliva ali zwiwulu zwili zwitatu (3 000).’

Ngono kukati nlanda wenyu atjakabhata mimwe mishingo, iwoyo nthu katizha.” Mambo kandwa kati, “Wazwilebegwa, ndiko sekwa wakafanila lipa.”

Ipapo nlebesambeli kapalula jila laakabe akazwisunga ndilo mu buso, tjinyolotjo mambo we Iziraela kaziba kuti mmwe we balebesambeli.

Nlebesambeli kadwa mambo kati, “Yahwe banolebeleka beti, ‘Ngoti wakaletja nthu wandakabe ndadusila golomodzo, ndizo unowofa mu bumo gugwe ne bathu babo mu bumo gwe bathu babe.’ ”

Mambo we Iziraela kayenda ku ng'umba iye ye bushe ku Samariya, ali zhele bushongola kakale akadzipiwa nge shungu.