Old Testament

Samuele wakadwa Baiziraela bose kati, “Ndakamuteedza mu tjimwe ne tjimwe tjamakandidwa, ngono ndakamubigila mambo.

Bonani, ngwenu makatungamigwa ndi mambo, imi ndakwegula ndabe ne vi, koga bakololo bangu banamwi. Ndakamutungamila kudwa mu butjetjana gwangu kuswikila nasi.

Yezo ndipano, mungatendeka nge kwangu mbeli kwa Yahwe ne mbeli kwe nzhodziwa wabo. Apa ndiani wandakatolela ngabe iye kene? Kene ndakatolela ani donki tjitje kene? Kene ndiani wandakatjebela kene? Kene ndiyani wandakatshambilidza kene? Kene kuna wandakatongotola tjizwimbanlomo mu luboko gugwe kuzwibiga lidandi mu mesho natjo kene? Ha ndakatongothama tjimwe tja izwezwi munditendekele ndowomubuzila itjo.”

Bakashandula beti, “Amuzotongo titjebela kene kutitshambilidza, akuna wamakatongotolela tjimwe mu luboko gugwe.”

Wakabadwa kati, “Yahwe ntendeki nge kwenyu ne nzhodziwa wabo ntendeki nasi,” ngono bakati, “Ee, ntendeki.”

Ndizo Samuele kadwa bathu kati, “Yahwe ndibo bakabiga Mushe na Aroni, ngono bakadusa bobatategulu benyu kuzhe kwe Egipiti.

Ndizo ngwenu, imani ipapa, ngobe ndawozwilingisanya namwi ndipa butendeki mbeli kwa Yahwe, sekwa Yahwe bakamuthamila mishingo yose ye ndulamo, imwi na bobatategulu benyu.

Kwakati Jakubo asinoswika ku Egipiti, Baegipiti bakabatshambilidza, ndizo bobatategulu benyu bakalilila kuna Yahwe, Yahwe bakatuma Mushe na Aroni, bakadusa bobatategulu benyu mu Egipiti bakawobagadza mu shango iyeyi.

Koga bakakangang'wa Yahwe Ndzimu wabo, ndizo bakabatengesa mu maboko a Sisera nlauli we babhayani ba Hazori ne mu maboko e Bafilisitiya na mambo we Moabu, ngono bakagwa nabo.

Bakalilila kuna Yahwe bakati, ‘Takatjinya, tikalasha Yahwe tibe tishingila bo Bhaale na Ashitoreti. Koga ngwenu mutisunungule mu maboko e zwita zwedu, ngono towomushingila.’

Ndizo Yahwe bakatuma Jerubhaale na Bharaki na Jefutha na Samuele, ngono mukasungunugwa kudwa mu maboko e zwita zwenyu mu mbizho dzose, kuti ndizo mugale makabakiligwa.

Kwakati mu bona Nahashi mambo we Baamoni ezha kowobhayana namwi, mukandidwa mukati, ‘Atidi, toshaka mambo kuti atibuse, ipapo Yahwe Ndzimu wenyu bakabe bali mambo wenyu.’

Ngwenu woyo mambo wamakashalula, iye wamakakumbila, bonani, Yahwe bamubigila mambo.

Ha mungatja Yahwe, mubashingila mubateta, ngono musingapandukile milayo yabo, ngono ha mose imwi na mambo wenyu unomubusa mungatobela Yahwe Ndzimu wenyu, kowolulama.

Koga amusingawhilile whi la Yahwe, mube mupandukila milayo ya Yahwe, luboko gwa Yahwe gowobhayana namwi na mambo wenyu.

Ndizo mume koga, mubone tjithu tjikulukulu Yahwe tjabanowothama pa mesho enyu.

Apa ate zhuba le kuvung'wa kwe korong nasi kene? Ndotembezela kuna Yahwe kuti badidimise makole banise vula. Ngono mowoziba mukabona kuti bubiibi gwamakathama mu mesho a Yahwe muzwikumbilila mambo gukulu kwazo.”

Ndizo Samuele katembezela Yahwe, mu zhuba ilelo Yahwe bakadidimisa makole, bakanisa vula, ngono bathu bose bakatja Yahwe na Samuele kwazo.

Bathu bose bakadwa Samuele bakati, “Tembezelela balanda babo kuna Yahwe Ndzimu uwo kuti ndizo tisilobe, ngobe takapapha zwibi zwedu zose nge bubi gwe kuzwikumbilila mambo.”

Samuele kawa bathu kati, “Musitje, makathama bubi gose igogu, ne kwajalo, musitjashandukile ntome mu kutobela Yahwe, mushingile Yahwe nge mimoyo yenyu wose.

Musitongo shandukila ntome ku zwithu zwisina nshingo zwisingake zwikabuzila kene zwikatjidza, ngobe azwina nshingo.

Ngobe Yahwe abatowolashila bathu babo kutjena, nge ntha ye zina labo gulu, ngobe kwakada Yahwe kumuthama bathu babo.

Imi nge kwangu, kukulekule nami kuti ndithamile Yahwe tjibi, ngomisa kumutembezelela, ngono ndowomulaya nge zila yakalulama, yakatambunuka.

Mutje Yahwe koga, mubashingile nge malebeswa ne mimoyo yenyu yose, mukumbulukigwe ngekwe zwithu zwikulukulu zwabakamuthamila.

Koga ha mutjadwilila muthama bubi, mowolashigwa kutjena, mose imwi na mambo wenyu.”