Old Testament

Samuele wakadwa Saulo kati, “Ndimi wakatumwa ndi Yahwe kuti ndikuzhodze ube mambo we bathu babo Baiziraela, ndizo ngwenu teedza matama anodwa kuna Yahwe.

Etji nditjo tjinolebgwa ndi Yahwe Ndzimu Masimbawose beti, ‘Ndowoloba Baamaleki shamu muna zwabakathamila Baiziraela, bebadzibilidza mu zila pabakabe bedwa ku Egipiti.

Yenda unobulaya Baamaleki, ubalobese na zose zwabanazo, kusibe ne tjaungasiya, ubulaye balume ne bakadzi ne bana ne shabana, kose ng'ombe ne pkhwizi ne kamela ne madonki.’ ”

Ndizo Saulo kadana bathu, kababalila mu Telaimu, bakaswika babhayani banoyenda nge makumbo bali zwiwulu zwili mazana mabili (200 000) ne bali mazana ali gumi be Juda.

Saulo kayenda ku nzi we Baamaleki kabalalela mu nkuku.

Ndizo Saulo kadwa Bakeni kati, “Idwani ipapa! Mudwe pakati kwe Baamaleki, kuti ndisidwe ndimulobeselanya nabo, ngobe makalakidza buthu mu bathu bose be Iziraela pabakabe bedwa mu Egipiti.” Ndizo Bakeni bakabhuda mu Baamaleki.

Saulo kanginilila Baamaleki kudwa ku Havilaya kunoti ku Shuru, ku bhezhuba kwe Egipiti.

Wakatola Agagi mambo we Baamaleki ali mpenyu, koga kalobesa bathu babe bose ebatema nge bukanu.

Saulo ne ikwata bakasiya Agagi, ne pkhwizi dzakanaka ne ng'ombe ne zwikondolo zwakakodziwa ne pkhwizana na zose zwakabe zwili zwakanaka, zwikasikolomogwe tjoselele. Koga zose zwakabe zwisogwa, zwibong'wa zwisi zwetjimwe zwakakolomogwa tjoselele.

Dama la Yahwe lakazha kuna Samuele liti:

“Ndowha zogwadza kwandakathama Saulo mambo, ngobe wakandishandukila, kakale aazolondolodza ndaulo dzangu.” Samuele wakagwadza moyo, ka lilila kuna Yahwe busiku gose.

Samuele wakabinduka mangwanana enoshanganidza Saulo, ngono kadwiwa kuyi, “Saulo wakayenda ku Karimeli, kwaakabiga ifano tje kuzwipundumadza, ngono wakashanduka kadelukila ku Giligala.”

Kwakati Samuele eswika kuna Saulo, Saulo kan'dwa kati, “Yahwe ngabakukombolele, ndakalondolodza ndaulo ya Yahwe.”

Samuele kabhuzwa kati, “Edze pkhwizi ne ng'ombe dzandinowha dzilila ndedzeni?”

Saulo kashandula eti, “Babhayani bakazha nadzo bedwa ku Baamaleki, ngobe bakasiya pkhwizi ne ng'ombe dzakanaka kwazo, kuti kupisigwe Yahwe Ndzimu wenyu tjibhayilo, koga zwimwe takazwilobesa zose.”

Ndizo Samuele kadwa Saulo kati, “Ima! Ndowokubudza Yahwe tjabalala balebeleka nami busiku.” Saulo kashandula eti, “Undibudze.”

Samuele kabe eti, “Nakuto iwe uzwisola, apa auteli nsholo we njudzi dze Baiziraela kene? Yahwe bakakuzhodza kube mambo we Baiziraela.

Kakale Yahwe bakakutuma, bakakudwa bakati, ‘Yenda, unolobesa bathu ibabaje babiibi, Baamaleki, ugwe nabo kudzina befa bepela.’

Apa whutini usakawhilila Yahwe kene? Apa whutini wakatizhilila kutola zojiwa zwakatapiwa, ubuya uthama bubi mbeli kwa Yahwe kene?”

Saulo kashandula Samuele eti, “Ndakawhilila whi la Yahwe, ayenda kwa bakandituma. Ndakalobesa Baamaleki bose abuya na Agagi mambo wabo.

Koga mu zojiwa zwakatapiwa babhayani bakatola pkhwizi ne ng'ombe zwakanaka, zwabakada kuzwipisila Yahwe Ndzimu wenyu tjibhayilo ku Giligala.”

Ndizo Samuele kabhuzwa kati, “Apa Yahwe bangashathisiwa ngopisigwa zwibhayilo ne zwipo, sekwa kungawhiwa whi la Yahwe kene? Ndolebesa, kuwha ndayilo kopinda kupisa tjibhayilo. Koita kuwha Yahwe kupinda kubapisila mafuta e nyundo.

“Tjibi tje kupanduka atjitoita pa buloyi, ne mazwikudzo anofanana ne mbipo ye kuthigamila midzimu. Ngobe wakalamba dama la Yahwe, bakakulambabo kuti ube mambo.”

Saulo kashandula Samuele kati, “Ndakathama tjibi, ngobe ndakapandukila ndaulo ya Yahwe namwi asimuwhilile, ngobe ndakatja bathu azwipa mubali.

Ndizo ngwenu, ndomukumbila, mundizwiibhatigwe jinyo langu, mushanduke nami ndinonamata Yahwe.”

Samuele kan'dwa kati, “Anditowoshanduka nawe, ngobe wakalamba dama la Yahwe, na Yahwe bakalamba kuti ube mambo we Iziraela.”

Kwakati Samuele etendebuka eti unoyenda, Saulo kambata nge mpeto we tjiambalo tjitje, tjikapaluka.

Samuele kan'dwa kati, “Yahwe bapalula bushe gwe Iziraela nasi, bagudusa mu kuli, bagupa mmwe we ikamu tjitjo, unoyita pakuli.

Ibo ba Gudzo le Iziraela abatonyepa naiko abangashandule nkumbulo wabo, ngobe ibo abateli nthu, kwabangashandula nkumbulo wabo.”

Saulo kabe eti, “Ndakatjinya, ngono ndokumbila, mundikudze mbeli kwe batungamili be bathu bangu na mbeli kwe Iziraela, mubuye mushanduke nami, kuti ndinamate Yahwe Ndzimu wenyu.”

Samuele kashanduka na Saulo, Saulo kanamata Yahwe.

Ndizo Samuele kabe eti, “Mundizhisile Mambo Agagi we Baamaleki.” Agagi kazha kunli ana ganyu eti, “Tjoselele, kugwadza kwe lufu kwapinda.”

Ngono Samuele kati, “Sekwa bukanu gugo gwakathama bakadzi bobankulugwa, ndizo na mmeyabo banowobe bankulugwa pakati kwe bakadzi.” Ngono Samuele katemelela Agagi mbeli kwa Yahwe mu Giligala.

Samuele kamilika kayenda ku Rama, Saulo kayenda ku nzi uwe ku Gibiya.

Samuele aazotongo bona Saulo kuswikila efa, ali mu kuwha zogwaza ngekwa Saulo. Ngono Yahwe bakawha zogwadza kube bakathama Saulo mambo we Iziraela.