Old Testament

Hana katembezela eti, “Moyo wangu wakashathila Yahwe; simba langu lakudziwa muna Yahwe. Ndozwikudza na Yahwe. Ndoseka zwita zwangu mahanya, ngobe ndakashathila bhatsho yenyu.

“Akuna wakayengemala sa Yahwe, akuna mmwe kuzhe kwenyu, akuna shongwe inonga Ndzimu wedu.

Musitjalebeleke nge kuzwikudza, misani matama enyu ekuzwikudza, ngobe Yahwe Ndzimu we luzibo, ngono zwiyito zwe bathu zoyegwa ndibo.

Matati e babhayani akavunika, koga banodzembeleka banozhala masimba.

Bakamuka beguta boja ngo lubila, koga bakabe bali mu zhala, boguta. Wakabe asina mbeleko wabe ne bana bali kutendeka, koga nkadzi wakabe ana bana banji, wabe bankulugwa.

Yahwe ndibo banobulaya bebuya betjidza, banoyisa bathu ku bugalo gwe bafi, bakabuya bakamusa mu lufu.

Yahwe banothama nthu kabe nshayi bakabuya bakanfumisa, banodelusila nthu pasi bebuya bemmilidzila pezhugwi.

Banomilidza bashayi bebadusa mu whuluba, bemilidza basheti bebadusa mu tjizhalanlota, bebe bebagadza ne bakololo be bushe bebuya bewana tjigalo tje gudzo. Ngobe thiwa dze shango nge dza Yahwe, pezhugwi kwadzo bakagadza shango.

“Banowotjengeta makumbo e bagalimoyo babo, koga babiibi banofila mu zhalima, ngoti nthu aatokunda nge simba.

Zwita zwa Yahwe zowolobesiwa, Yahwe banowobadadamula bali ku kudzimu, Yahwe banowosumikilisa kunoti ku phelelo dze shango. Banowopa mambo wabo simba, bebuya bekudza simba le nzhodziwa wabo.”

Ndizo Elikana kayenda kanyi kwabo ku Rama, koga mbisana kasala eshingila Yahwe ali pasi kwe mpirisiti Eli.

Bakololo ba Eli bakabe bali balume basi be tjimwe, basina hanya na Yahwe.

Mu tjilenje tje bapirisiti, kwakabe kuti ha nthu edusa tjibhayilo, nyama itjakapaila, nlanda we mpirisiti unobe ezha akabhata foroko ye meno matatu,

ebe ebhayila foroko mu hali, ngono nyama ya bhayiwa nge foroko inobe iyo iye. Koga ngwenu bakololo ba Eli bakabe bethama sawhoku ku Baiziraela bose bakabe bezha ku Shilo:

Kwakabe kuti mafuta asathu kapisiwa, nlanda we mpirisiti wakabe ezha kuna unobe episa tjibhayilo ebe endwa eti, “Dusila mpirisiti nyama inogotjiwa, ngobe aangaamutjile nyama mukuli yakabhikwa, ungaamutjila mbisi koga.”

Koga ha nthu angandwa eti, “Ima takhwa bapise mafuta, ndizo ukotolazo sekwa unoshaka,” nlanda ebe eshandula eti, “Andidi, undipe iyo ngwenu, ha ulamba ndoitola nge khani.”

Ndizo jinyo ileli le bazhuzha ibaba lakabe lisishoma mu mesho a Yahwe, ngobe bathu bakalengudza zwibhayilo zwa Yahwe.

Samuele wakabe eshingila Yahwe, ali mbisana akaambala khiba ye bupirisiti ye jila.

Mmeyabe bakabe benthumila hazu yakanlizana ben'yendila iyo gole ne gole, abeyenda ne nlume wabo kunodusa tjibhayilo tje gole.

Ipapo Eli kakombolela Elikana ne nkadzi uwe eti, “Tshene Yahwe bangakupa bana nge nkadzi iwoyu kumisila iwoyo waakawana nge mitembezelo ebe empa Yahwe.” Ndizo bekobgwilila kanyi kwabo.

Ngono Yahwe bakawhila Hana ngoni, kazwisenga kawana bakololo batatu ne bakololokadzi babili. Sa ikoku mbisana Samuele kakulila mu mesho a Yahwe.

Ngweno Eli wakabe atjikwegula kwazo. Kawha kose kwakabe kuthamwa nge bakololo babe mu Iziraela yose, nenge sekwa bakabe bewalilana ne bakadzi bakabe beshingila pa nkoba we nshasha we gubungano.

Kabadwa kati, “Apa whutini muthama zwithu zwakajali kene? Bathu bose banondibudza ngekwe mishingo yenyu yakabipa.

Andidi, bana bangu, ate ili tjithu tjibuyanana tjandinowha bathu ba Yahwe betjiandamisa.

Ha nthu angatjinyila mmwe, Ndzimu ungammila, koga ha nthu angatjinyila Yahwe, apa ndiani unganlebelekela kene?” Koga bakololo ba Eli, bakasibhulutane matama a tate babo, ngobe kwakabe kuli kuda kwa Yahwe kuti bababulaye.

Mbisana Samuele kadwilila ekula ediwa ndi Yahwe nenge bathu.

Nthu we Ndzimu wakazha kuna Eli kandwa kati, “Etji nditjo tjakalebgwa ndi Yahwe beti, ‘Apa andizozwilakidza ku ng'umba ya tate babo Aroni pabakabe bali mu Egipiti bali balanda ku ng'umba ya Faro kene?

Apa andizoshalula ibo kudwa mu njudzi dzose dze Iziraela kube mpirisiti wangu, kuti batathile ku tjibeso tjangu tjinopisigwa zwibhayilo, kunopisa motsha ne kuti baambale khiba ye bupirisiti mbeli kwangu kene? Apa andizo papha hapa nsha wa tate babo zwipo zwangu zose zwinopisiwa nge moto kudwa mu bathu be Iziraela kene?

Apa whutini makalembeledzela moyo zwibhayilo ne zwipo zwangu zwandakati zwithamigwe mu bugalo gwangu, iwe Eli ubuya uteta bana babo kupinda imi, muzwikodza nge mitezho yakashalulika ye tjipo tjimwe ne tjimwe tje bathu bangu Baiziraela kene?’

Ndizo Yahwe Ndzimu we Iziraela baleba beti, ‘Ndakagadzabgwe nditi, nsha uwo ne wa tate babo inowotjilila mbeli kwangu nge kusingapele.’ Koga ngwenu Yahwe banolebeleka beti, ‘Ngakube kutjena nami. Ibo banonditeta ndowobatetabo, koga ibo banondilengudza, banowotogwa basi be tjimwe.

Bona, tjibaka tjaswika tjandinotapudza simba lilo ne simba le nsha wa tate babo, kuti kushete unowokwegula mu nsha uwo.

Ndizo mu kuwha zogwadza unowodwila moyo zose zwakanaka zwinowokombolegwa Iziraela, ngono mu nsha uwo akuna unowokula kakwegula.

Wenyu wandinosathubula mu kushinga pa tjibeso tjangu tjinopisigwa zwibhayilo, unowobe asiyigwa kutebula mishodzi ne buyendasi mu moyo uwe, bose be ludzi gugo banowofa.

Tjinowowila bakololo babo babili, Hofini na Finihasi, tjowobe tjilakidzilo mu kuli, banowofa bose mu zhuba ling'ompela.

Ndowozwishaluligwa mpirisiti unogalikabgwe, unowoshinga kuyendidzana ne kuda kwe moyo wangu ne meya yangu. Ndowombakila nsha wakasima, ngono unowoshingila nzhodziwa wangu nge kusingapele.

Mmwe ne mmwe wasala mu nsha uwo, unowozha kuwonthigamila ekumbila siliva kene zojiwa, ngono unowoti, “Ndokumbila mundibige mu tjigalo tje bupirisiti kuti ndiwane zojiwa ndije.” ’ ”