Old Testament

Hezekiya katumila ndaidzo ku Baiziraela bose ne ku Bajuda bose kakwalila Ifureimi ne Manase whalo kuti bazhe ku Ng'umba ya Yahwe mu Jerusalema ne kuwoshongozhela Nzano we Kupinda pezhugwi wa Yahwe Ndzimu we Iziraela.

Ngobe mambo ne makulukota awe ne gubungano lose mu Jerusalema bakabe basunga kuti kulondolodziwe Nzano we Kupinda pezhugwi mu mwedzi we bubili.

Bakabe basingatubule kuulondolodza nge tjibaka tjawo ngobe kwakabe kusina bapirisiti bakaswika ngoti bakabe basazwitjenapadza ne bathu bakabe basakakubungana ku Jerusalema.

Ngono ndongoloso iyeyi yakabe ilingika yakalulwama mbeli kwa mambo ne gubungano lose.

Ndizo ndaulo yakadusiwa kuti kudang'we Baiziraela bose kudwa tjose ku Bheerisheba kunoti ku Dani, kuti bathu bazhe bawolondolodza Nzano we Kupinda pezhugwi wa Yahwe Ndzimu we Iziraela ku Jerusalema ngobe kwakabe kwabe tjibaka tjilefu basinga tjauzane sekwa bakadwiwa.

Nge ndaulo ya mambo batumwa bakayenda Iziraela yose ne Juda nge whalo dzinodwa kuna mambo ne makulukota, whalo dzakabe dzibalika sawhoku: “Bathu be Iziraela, shandukilani kuna Yahwe Ndzimu wa Abhurahama na Isaki na Iziraela kuti ndizo babgwililebo kumuli imwi makasala, imwi makapudzumuka mu maboko a bomambo be Baasiriya.

Musinge bobatategulu benyu ne zwikamu zwenyu ibo bakabe ne kusagalikabgwe kuna Yahwe Ndzimu wa bobatategulu babo ngono kabathama zwishingisiwa zwe zwithu zwinotjenamisa sekwa koga mubona.

Musiwomeledze mitshibha sa botate benyu, muzwiyise pasi kuna Yahwe. Izhani ku bugalo gwabo gwakayengemala igo Yahwe Ndzimu wenyu gwabakathama kuti gugale gwakayengemala tjatjose, muzhe mubashingile kuti ndizo basitongomugwadzila moyo tjatjose.

Ha mungashandukila kuna Yahwe, zwikamu zwenyu ne bana benyu banowowhigwa ngoni ne basungi babo ngono banowobgwilila ku shango yabo ngobe Yahwe Ndzimu wenyu bana ngoni ne mawhilozogwadza. Abangamufupatile amushandukila ku bali.”

Batumwa bakayenda mizi mikulu yose mu mituthu yose ye njudzi dza Ifureimi na Manase ne kunoti ku bunandzwa ku ludzi gwa Zebuluni koga bathu bakabe bebaseka bebadadila.

Nekwakajalo, bamwe balume be Asheri ne Manase ne Zebuluni bakazwiyisa pasi bakayenda ku Jerusalema.

Simba le Ndzimu likabe lili mu bathu be Juda, wakabapa meya nng'ompela kuti babhatane bathame tjalaugwa ndi mambo ne makulukota ngekwe dama la Yahwe.

Mbunga usi nshoma ukanokubungana ku Jerusalema kunolondolodza Nzano we Tjiwunga tjisina Mbidzo mu mwedzi we bubili.

Bakadusa zwibeso zose zwakabe zwishingisiwa zwili zwinodusigwa zwibhayilo ne zwinopisiwa motsha mu Jerusalema ngono bakanozwilashila ku nkuku we Kidironi.

Ngono mu zhuba le bugumi lina manna (14) le mwedzi we bubili bakabhaya pkhwizana dze Nzano we Kupinda pezhugwi. Bapirisiti ne Balevi bakabe basazwitjenapadza bakabhakhwa nge shoni ngono bakazwitjenapadza bakazhisa zwibhayilo zwinopisiwa ku Ng'umba ya Yahwe.

Bakadwapo betola magalo abo sekwa kuli iko mu nlayo wa Mushe nlume we Ndzimu. Bapirisiti bakanyasa malopa abakabe bepiwa ne Balevi.

Ngoti kwakabe kuna bathu banjinji mu gubungano bakabe basakazwitjenapadza, ndizo Balevi bakabe bakafanila kubhayila mmwe ne mmwe wakabe asi mbuyanana pkhwizana ye Nzano we Kupinda Pezhugwi kuti kube kwakayengemala kuna Yahwe.

Nenguba bunji gwe bathu bakabe bedwa ku Ifureimi ne Manase ne Isakari ne Zebuluni bakabe basazwitjenapadza, bakaja tjibhayilo tje Nzano we Kupinda Pezhugwi ikoku kusi iko kwakakwagwa mu nlayo. Koga Hezekiya wakabatembezelela eti, “Tshene Yahwe, ibo bakalulwama, bangazwiibhatigwa mmwe ne mmwe,

we moyo uwe umukushaka Ndzimu, Yahwe Ndzimu wa bobatategulu babe nenguba angabe asakatjenapala sekwa milayo inoshaka.”

Ngono Yahwe bakadabila Hezekiya ngono Yahwe bakatjidza bathu.

Kwakabe kwe mazhuba ali kutendeka bathu bakakubunganila ku Jerusalema belondolodza Nzano we Tjiwunga tjisina Mbidzo nge shatho whulu ngono zhuba ne zhuba Balevi ne bapirisiti bakabe bekudza Yahwe nge mimoyo yabo yose.

Hezekiya wakalebeleka ekudza Balevi bose bakalakidza bunyambi mu nshingo wa Yahwe. Ndizo bathu bakaja zojiwa zwe nzano kwe mazhuba ali kutendeka, bedusa zwibhayilo zwe mbakisano ne kuyisa mboko kuna Yahwe Ndzimu wa botate babo.

Ipapo gubungano lose likadumana kuti badwilidzile nzano kwe mamwe mazhuba ali kutendeka nge kushatha.

Mambo Hezekiya kadusa mikono ili tjiwulu (1 000) ne pkhwizi ne mbudzi dzili zwiwulu zwili kutendeka (7 000) kuti bathu babhaye baje, ngono makulukota kabapa mimwe mikono ili tjiwulu (1 000) ne pkhwizi ne mbudzi dzili zwiwulu zwili gumi (10 000). Bapirisiti banji bakazwitjenapadza.

Gubungano lose le Juda likashatha kose ne bapirisiti ne Balevi na bose bakabe bazha bedwa ku Iziraela kubaligwa ne bazhi bakabe bedwa kuzhe kwe Iziraela na ibabo bakabe begala mu Juda.

Kwakabe ne kushatha kukulu mu Jerusalema ngobe tjinga kudwa tjibaka tja Solomoni nkololo wa Dafite mambo we Iziraela akuzotongobe ne tjakajali mu Jerusalema.

Bapirisiti ne Balevi bakama ne makumbo bakakombolela bathu ngono Ndzimu ukabawha ngobe ntembezelo wabo wakaswika kudzimu ku bugalo gwawo gwakayengemala.