Old Testament

Josiya wakabe ana makole ali zhanakadzi tjibaka tjaakatangisa busa, wakabusa makole ali makumi matatu ana gole (31) mu Jerusalema.

Wakathama ndulamo mbeli kwa Yahwe, katshamba thambo dza batategulu babe Dafite, kasi pambukile ku luji kene ku lumeshwe.

Ngono kwakati mu gole le buzhanakadzi le mbuso wa Josiya atji ntjetjana, katangisa kunamata Yahwe Ndzimu wa batategulu babe Dafite. Kwakati mu gole le bugumi lina mabili katangisa kutjenapadza Juda ne Jerusalema nge kukolomodza magalo a pezhugwi akabe athigamigwa midzimu kakolomodza ne ndzimukadzi Ashera ne zwifano zwakabezhiwa ne zwimwe zwakabumbiwa zwe midzimu.

Nge ndaulo iye zwibeso zwe zwibhayilo zwa bo Bhaale zwakakolomodziwa ne zwibeso zwinopisigwa motsha zwakabe zwakabakwa pezhugwi kwe zwe zwibhayilo zwakakolomogwa zwikabe zwipithu pithu, kaligila kutjena panda dze ndzimukadzi Ashera ne midzimu yakabezhiwa ne yakabumbiwa kaikwiya katola mavu yawo kaipaladzila pezhugwi kwe zwikumbu zwa ibabo bakabe bepisila midzimu.

Wakapisila mafupa e bapirisiti mu zwibeso zwabo ngono katjenapadza Juda ne Jerusalema.

Ku mizi ye Manase ne Ifureimi ne Simiyoni kunoti ku Nafutali ne matongo akapoteleka,

wakakolomola zwibeso ne zwifano zwe ndzimukadzi Ashera kapkhwanya midzimu kaikwiya ikasala inga bgwisa kapkhwanya ne zwibeso zwakabe zwipisigwa motsha. Kudwapo kabgwilila ku Jerusalema.

Kwakati nge gole le bugumi lina makole ali zhanakadzi (18) le mbuso wa Mambo Josiya shule kwe batjenapadza Ng'umba ye Ndzimu kose ne shango, bakatuma Shafani nkololo wa Azaliya na Maaseya nlauli we nzi nkulu na Joahi nkololo wa Joahazi we nkwalili, kuti banomusa Ng'umba ya Yahwe Ndzimu uwe.

Bakayenda kuna Hilikiya ntungamili we bapirisiti ngono bakampa mari akabe adusigwa Ng'umba ye Ndzimu akubunganyiwa ne Balevi ne balisi be nkoba we Ng'umba ya Yahwe, mari iyawa akabe akubunganyiwa kudwa mu bathu be Manase ne Ifureimi ne mu malimbelimbe wose e Iziraela ne mu bathu bose be ntuthu we Juda ne Bhenjamini ne mu bagali bose be Jerusalema.

Bakatola mari iyawa bakaapa batungamili bakabe babigwa kubona kuti nshingo we Ng'umba ya Yahwe unoyenda zubuyanana kuti ndizo balipe bashingi banomusa Ng'umba ye Ndzimu

ne babezhi ne babaki kuti batenge mabgwe akabezhiwa ne mapango embalilo ne makwasayile e mbako dzakabe dzaletjedziwa ndi bomambo be Juda kuti dziwe.

Balume bakabe beshinga bakashinga nge mimoyo yabo yose. Bakabe bakatungamigwa ne Balevi bakabe bali be nsha wa Merari ibo bali bo Jahati na Obadiya na Zakhariya na Meshulamu bakabe bali be nsha wa Kohati. Balevi ibaba bakabe bali nyambi dzelidza zwilidzo,

kakale bakabe bakalingisana ngobona kuti bashingi bose banoshinga mishingo yabo ngosiyana kwayo. Balevi bamwe bakabe bali bakwalili bamwe bali balisi be mikoba.

Ngono bakati batjadusa mari abakabe babiga mu Ng'umba ya Yahwe, Hilikiya mpirisiti nkulu kawana Lukwalo gwe Nlayo wa Yahwe gwa Mushe gwaakabe apiwa ndi Yahwe.

Hilikiya kabe eti kuna Shafani we nkwalili, “Ndawana lukwalo gwe Nlayo mu Ng'umba ya Yahwe.” Hilikiya kagupa Shafani

Ngono Shafani kayisa lukwalo kuna mambo, kabikila mambo eti, “Balanda benyu banoshinga kose kwamakati bathame.

Mari akabe ali ku Ng'umba ya Yahwe bakaapa batungamili be bashingi be bathu ne bashingi.”

Ndizo Shafani nkwalili kadwa mambo kati, “Hilikiya mpirisiti wandipa lukwalo igogu.” Ngono Shafani kagubala mbeli kwa mambo.

Kwakati mambo basinowha matama e lukwalo igogu gwe nlayo, bakapalula zwiambalo zwabo.

Ngono bakapa Hilikiya na Ahikamu nkololo wa Shafani na Abidoni nkololo wa Mika na Shafani nkwalili na Asaya nlanda wa mambo ndaulo inoti,

“Yendani kuna Yahwe Ndzimu munondibhuzwila imi ne bathu na bose bakasala mu Iziraela ne Juda ngekwe lukwalo igogu gwawang'wa, ngobe Yahwe bazhala bushongola kwazo nge kwa bobatategulu bedu basakabhulutana matama a Yahwe kakale abazolondolodza tjakakwagwa mu lukwalo igogu.”

Ndizo Hilikiya na bose bakabe batumwa na mambo bakayenda kuna Hulida nlebesambeli wakabe ali nkadzi wa Shalumu nkololo wa Tokhati, Tokhati ali nkololo wa Hasira wakabe ali ntjengeti we hazu dze Ng'umba ye Ndzimu. Hulida wakabe egala ku Jerusalema ku Ntuthu ntshwa. Bakalebeleka naye nge kwako.

Ngono Hulida kabadwa kati, “Yahwe Ndzimu we Iziraela bakati, ‘Endani munodwa nlume wamutumila kundili

muti, “Ndowodelusa mbipo mu ntuthu iwoyu ne mu bagali bawo, bhiso lose lakakwagwa mu lukwalo igogu labagwa mbeli kwa Mambo we Juda,

ngoti bakandifupatila bakapisila midzimu ipoga motsha. Ndizo bakandishongola nge mishingo yabakathama nge maboko abo, ndizo bushongola gwangu gowothuta ngono agutowodzimika.”

Koga ngekwa mambo we Juda wamutuma kuwobhuzwa kuna Yahwe mubadwe muti Yahwe Ndzimu we Iziraela bakati, “Se wawha matama angu mu lukwalo,

ngobe moyo uwo wabe nnyolo, ukazwiyisa pasi mbeli kwangu, ukapalula zwiambalo zwizo ukalilila mbeli kwangu, ndakuwha, koleba Yahwe.

Ndizo bona, unowotobela bobatategulu babo, unowobiganyiwa nge kunyalala, autowobona bubi gose gwandinozhisa mu bugalo igogu ne mu bagali bose bago.” ’ ” Ndizo bakabgwilila kuna Mambo Josiya nge matama iyawa.

Mambo Josiya kakubunganya bathu bakulu bose be Juda ne be Jerusalema.

Mambo bakayenda ku Ng'umba ya Yahwe ne bakololo bose be Juda naibo bose be Jerusalema ne bapirisiti ne balebesambeli ne bathu bose bakulu ne batukununu, ndizo bakababalila matama wose e lukwalo gwe tjidumano gwakabe gwa wang'wa mu Ng'umba ya Yahwe.

Mambo bakama mu magalo abo ngono bakathama tjidumano ne meya dzabo dzose mbeli kwa Yahwe ili tjidumano tjekutobela ne kutjengeta milayo ya Yahwe ne kuthama zose zwakabe zwakakwagwa mu lukwalo gwe tjidumano.

Bakathama kuti bathu bose bakabe bali mu Jerusalema ne Bhenjamini babe ne mazwimisilo ekuti banoshinga tjidumano itjetjo. Bathu be Jerusalema bakathama koyendidzana ne tjidumano tje Ndzimu, Ndzimu wa bobatategulu babo.

Mambo Josiya kadusa midzimu yose inoshimisa mu ntuthu we Baiziraela kakale kakulumbidza bose bakabe bali mu Iziraela kuti bashingile Yahwe Ndzimu wabo. Mu butjilo gugwe gose abazopambuka mukutobela Yahwe Ndzimu wa bobatategulu babo.