Old Testament

Kwakati Mambo Hezekiya e wha nge kwako, kapalula zwiambalo zwizwe ngono kaambala jila le saka kanongina mu ng'umba ya Yahwe.

Ngono katuma Eliyakimu, iye wakabe ali ntjengeti we ng'umba ye bumambo ana Shebina nkwalili ne bapirisiti bakulu ku nlebesambeli Isaya nkololo wa Amozi, bose bakabe bakaambala matyila e saka.

Bakadwa Isaya bakati, “Hezekiya kati, ‘Zhuba lino i zhuba le buyendasi, le kutjemegwa nele kubhakhwa nge shoni, lofanana ne mwana akafanila kuti atshibamiwe ngono mmeyabe basitjina simba le kuti bantshibame.

Kungana kukabe kwashingikala kuti Yahwe Ndzimu uwo babe bawha matama wose alebgwa ne nkulu we balauli be babhayani be Asiriya, wakatumiwa ndi tetshi uwe kudadila Ndzimu unotjila, ngono pamwe banowontjemelela matama Yahwe Ndzimu uwo abawha e aleba. Ndizo tembezelela malimbelimbe akasala.’ ”

Makombgwa a Mambo Hezekiya akati eswika kuna Isaya,

Isaya kabadwa kati, “Kadweni tetshi wenyu muti, ‘Yahwe bakati, usitje tjimwe ngekwe matama iyawa awawha, andatukwa ndiwo nge balanda ba mambo we Asiriya.

Bonani, ndowolonga meya mu nli, ngono unowowha makwayi, kabgwilila ku shango iye kwandinowothama kuti abulawe nge thumo mu shango iye.’ ”

Nkulu we balauli be babhayani be Asiriya kabgwilila ku shango iye, ngono kawana mambo we Asiriya egwa ne Libina ngoti wakabe awha kuyi mambo bakabhuda mu Lakhishi.

Senakheribu mambo we Asiriya kawha ngekwa Tirihaka we Itopiya kuti waswika kuwogwa naye. Wakati ewha ikoku katuma batumwa kuna Hezekiya kabadwa kati,

“Kadweni Hezekiya mambo we Juda muti, ‘Musitongo tjebegwa nge Ndzimu wamunogalabgwe muuli nge kumugadzabgwe kuti Jerusalema ayingawile mu maboko a mambo we Asiriya.’

Bonani, makawha tjakashingwa ndi bomambo be Asiriya mu shango dzose, bakadzilobesa. Ngono apa imwi mungatjidziwa kene?

Apa midzimu ye zwitjaba yakazwitjidza kene? Bakalobesiwa ndi botate bangu ndiaba, bathu be Gozani ne Harani ne Rezefu ne bathu be Edeni bakabe bali mu Telasari.

Ungayi mambo we Hamati ne mambo we Aripadi ne mambo we nzi nkulu Sefarivaimu kene we Hena kene we Iva?”

Mambo Hezekiya kaamutjila lukwalo mu batumwa ngono kagubala. Ngono kayenda nago ku Ng'umba ya Yahwe kaguwala mbeli kwa Yahwe.

Ngono Hezekiya katembezela Yahwe kati, “Imwi Yahwe Masimbawose, Ndzimu we Iziraela imwi mu gele pezhugwi kwe dzikherubhu, ndimwi Ndzimu muli moga mu mibuso yose ye shango, makathama kudzimu ne shango.

Teedzani mu whe, imwi Yahwe, muwhe ngono mulinge nge mesho enyu mubone imwi Yahwe, iwhani matama a Senakheribu aakazhisa kudadila Ndzimu unotjila.

Yahwe, malebeswa bomambo be Asiriya bakathukudza zwitjaba ne shango dzazo,

bakalashila midzimu yazo mu moto nenguba yakabe isi midzimu koga zwili zwithu zwakathamiwa nge maboko e bathu, kuli zwikuni ne mabgwe ndizo wali zwakakolomodziwa.

Ndizo, Yahwe Ndzimu mutigwile mu simba lile, kuti ndizo mibuso yose ye shango izibe kuti imwi moga ndimwi Yahwe.”

Ipapo Isaya nkololo wa Amozi katuma nthu kuna Hezekiya kunon'dwa eti, “Yahwe Ndzimu we Iziraela bakati, ‘Nda wha kunditembezela kuko ngekwa Mambo Senakheribu we Asiriya.

Ngono dama lalebgwa ndi Yahwe nge kukwe yeli: “ ‘Mwanadi we Ziyoni unokuseka maanya, unokudadila, nkololokadzi we Jerusalema unokuzunguzila nsholo.

Wakatuka ukadadila yani kene? Ndiyani wawaka milidzila whi ubonyabonya mesho uzwikudza kene? Uthamila wakayengemala we Iziraela.

Wakatuma balanda babo kudadila Yahwe, wakalebeleka uti, “Ndakatathila pezhugwi kwe matombo nge koloyi dzangu dzengwa njinji, anoti ku midzibo ikule ye Lebanoni, aligila pasi miti yako milefu inoyi misida, ne misipuri yakanaka. Ndakaswika pezhugwi kwayo, angina mu ishaka tjayo tjakazwiyana.

Ndakatsha matshime ngono ang'wa vula mu shango ye bataya, ndakapkhwisa whobana dzose dze Egipiti nge matshambo angu.”

Awuzotongobe wawha kene kuti ndakakulongolosa ntolo ikoku kene? Tjandinoshingikadza sangwenu nge tjandakalongolosa ntolo, tjekuti mizi mikulu ye matizhilo, unoyipkhwanya ikasala ili matuluthulu e malala.

Babaki bako bakapedziwa simba, bakawhumana bakabhakhwa nge shoni, bakafanana ne zwidzwalo zwimu nnda, ne bushwa gutjibutjetjana gusathu gukasima, nenge bushwa gwakamela pezhugwi kwe ng'umba, gwapisiwa nge zhuba gusathu gukakula.

Ndoziba kwaunogala ne tjibaka tjaunomilika, ndoziba kubhuda kuko ne kungina kuko, ne kundimukila nge bushongola kuko.

Ngoti wakandimukila nge bushongola, ngono kuzwikudza kuko kukaswika mu zebe dzangu, ndowokulonga pima mu tjimilo ne tomu mu nlomo uwo, ndowokubgwiliza nge zila yawakazha ndiyo.

“ ‘Tjilakidzo tjowobe etji ku kuli, mugole lino mowoja tjinozwimelegwa, muna linozha mowoja mazhamba atjo, koga muna le butatu mudzwale, muvune, mulime minda ye mizhambi ngono muje mitjelo yayo.

Malimbelimbe akatjila e ng'umba ya Juda anowokula se ndzi unokula pasi ube ne thabi pezhugwi dzibe ne mitjelo.

Ngoti malimbelimbe anowobhuda mu Jerusalema, mu Dombo le Ziyoni kowobhuda gupo le bakatjila. Kupisika kwa Yahwe Masimbawose ndiko kunowothama ikoku.

Ndizo tjinolebgwa ndi Yahwe ngekwa mambo we Asiriya ndiyetji, “Aatowotshamba mu nzi nkulu iwoyu, akuna nsebe waanowoposa muuli, aatowoboneka mbeli kwawo akabhata tjiviko kene kuli kuukomba nge ngwa.

Zila yaakazha ndiyo, ndiyo yaanowobgwilila ndiyo. Aatowotshamba mu nzi nkulu iwoyu, koleba Yahwe.

Nzi nkulu iwoyu ndowoumila kuwutjidza, ndiwuzwitjidzila kakale ndiwutjidzila Dafite nlanda wangu.” ’ ”

Ipapo ntumwa wa Yahwe kayenda ku bukotokelo gwe Asiriya ngono kabulaya babhayani bali zwiwulu zwili zana lina makumi ali zhanakadzi lina mashanu (185 000). Kwakati tjimuka mangwanana bakabe bakafa bali zwitumbu.

Ipapo Senakheribu mambo we Asiriya kamilika kayenda ku nzi kanogala ku Ninive.

Kwakati limwe zhuba atjanamata ndzimu uwe wakabe uyi Nishirokhi mu ng'umba yawo, Adiramelekhi na Shareze bakololo babe bakambulaya nge thumo, ngono bakatizhila ku shango ye Ararati. Ngono nkololo uwe Esarihadoni kan'gala thaka.