Old Testament

Ngono Abusalomu nkololo wa Dafite kabene hazwadzi mbuya zina lile kuyi Tama, Amunoni nkololo wa Dafite kada Tama.

Amunoni wakagwadzika kwazo, kwaakanging'wa nge bugwele ngekwe hazwadzi iye Tama, se akabe atji mwanadi, ngono kukasimila Amunoni kunthama tjimwe.

Amunoni wakabe ana nzwalani uwe unoyi Jonadabe ali nkololo wa Shimeya, Shimeya nkulu wa Dafite, ngono Jonadabe wakabe ali jenjedu le nlume.

Kabhuzwa Amunoni kati, “Kwatini iwe nkololo wa mambo ulingika wakafubala mangwanana mamwe ne mamwe, nlandu ini?” 'GAmunoni kan'dabila eti, “Ndoda Tama, hazwadzi ya Abusalomu nnung'una wangu.”

Jonadabe kandwa kati, “Uzwithame unogwala ungine mu ngubo uizele, ngono ha tate babo bezha kuwokushola, ube ubadwa uti, ‘Ndokumbila hazwadzi yangu Tama kuti azhe kuwondipa tjinojiwa, ngono abhike zojiwa ndakanlinga kuti ndimbone, ndibe ndija akandibhatila izo.’ ”

Ndizo Amunoni kalala pasi kazwithama unogwala, ngono mambo bakati bezha kuwonshola, Amunoni kabadwa kati, “Ndokumbila hazwadzi yangu Tama kuti azhe andithamile tjiwunga ndakanlinga, ndizo ndokowoja akandibhatila.”

Dafite kayisa dama kuna Tama ku ng'umba ye bushe linoti, “Yenda ku ng'umba ye hazwadzi iyo Amunoni umbikile zojiwa.”

Ndizo Tama kayenda ku ng'umba ye hazwadzi iye Amunoni, kwaakabe alileleko. Tama katola bgwisa gwe tjiwunga, kaguvanga, kathama makhekhe hazwadzi iye yakanlinga, kaabhika.

Tama katola pani kapakula makhekhe kaabiga mbeli kukwe, ngono kalamba kuja. Amunoni kadwa Tama kati, “Idwa bathu bose badwe ipapa” Mmwe ne mmwe kadwa panli.

Ndizo Amunoni kadwa Tama kati, “Zhisa zojiwa ku ng'umba yangu ye bulalo, kuti ndije wakandibhatila.” Tama katola makhekhe aabhika, kaayisa ku ng'umba ye bulalo kuna Amunoni hazwadzi iye.

Koga wakati atjiswika nawo pejo naye kuti aje, kambata, kandwa kati, “Izha ngeno tiyizele hazwadzi yangu.”

Wakan'dabila eti, “Usithame uijalo hazwadzi yangu, usindikombeledze, kuthu kwakajali akutothamwa mu Iziraela. Usithame kubibi kwakajali!

Imi shoni dzingapa ndowodziyisa ngayi kene? Ngono nawebo unowobe unga mmwe we zwilengwe zwibiibi mu Iziraela. Ndokukumbila, lebeleka na mambo, ndoduma nditi abangalambe undilobola.”

Koga Amunoni kalamba kunteedza, ngoti wakabe enkulila nge masimba, kambata kandzula.

Ndizo Amunoni kabenga Tama lubengo gwakabangalala. Nge malebeswa, kambenga kupinda sekwa kwaakabe en'da ndiko. Kandwa kati, “Milika udwe ipapa!”

Koga Tama kandwa kati, “Ndolamba! Kunditata kuko kothama mbipo kupinda tjawandithama kale!” Koga Amunoni kalamba kunteedza.

Kadana nlanda uwe kandwa kati, “Dusila nkadzi iwoyu kuzhe, adwe ipapa, ube uzhalila unkhiyila kuzhe.”

Ndizo nlanda uwe kabe en'dusa enkhiyila kuzhe. Tama wakabe akaambala thako ndefu yakanakisiwa ina maboko, ngobe nditjo tjiambalo tjakabe tjiambagwa nge bakololokadzi ba boshe be baanadi.

Tama kazwidila nlota mu nsholo, ebuya epalula thako yakanakisiwa yaakabe akaambala, kasenga maboko mu nsholo, kayenda edoroma.

Hazwadzi iye Abusalomu kambhuzwa kati, “Hazwadzi iyo Amunoni wakudzula kani? Tjinyalalazo, hazwadzi yangu, nkulu uwo, usitongo longa kuthu ikoku mu moyo.” Tama kagala mu ng'umba ye hazwadzi iye Abusalomu akawha zogwadza.

Kwakati Dafite ewha kose ikoku, kazhala bushongola kwazo.

Koga Abusalomu kabenga Amunoni kwazo ngobe Amunoni wakabe adzula hazwadzi iye Tama, ngono kasitjan'lebese.

Kukati shule kwe makole mabili, Abusalomu kabe ana bateseli be pkhwizi ku Bhaalehaza, pejo ne n'gathu we Ifureimi, kakoka bakololo bose ba mambo kuti babe yapo.

Abusalomu kazha kuna mambo kabadwa kati, “Nlanda wenyu una bateseli be pkhwizi, apa mambo ne makulukota abo abangayende nami kene?”

Koga mambo bakadabila beti, “Akungajalo, nkololo wangu, atingayende tose, tingadwa tinobe ntolo mukuli.” Abusalomu katshindilila mambo, koga kalamba, koga kankombolela.

Ndizo Abusalomu kabe eti, “Ngono ha musingayende, ndokumbila kuti tiyende ne nkulu wangu Amunoni.” Mambo bakambhuzwa beti, “Ini akafanila yenda namwi?”

Koga Abusalomu katshindilila mambo kudzina beletja Amunoni ne bakololo bose ba mambo beyenda naye. Abusalomu wakathama nzano unonga nzano wa mambo.

Abusalomu kadwa balanda babe kati, “Teedzani! Ha Amunoni ang'wa nkumbi we zhambi atjilaladza, ngono ha ndimudwa nditi, ‘Bulayani Amunoni, mube mumbulaya. Musitongotja, apa ate imi ndamupa ndaulo iyeyi kene? Musime mube ne tjilopa!’ ”

Ndizo balanda ba Abusalomu bakateedza tjaaleba bakabulaya Amunoni sekwa bakabe badwiwa ndi Abusalomu. Ipapo bakololo ba mambo bose bakamilika bakataswa mowulo dzabo bakatizha.

Bakati batji mu zila kukaswika mima kuna Dafite inoti, “Abusalomu wabulaya bakololo ba mambo bose, akuna ne nng'ompela wabo wasala.”

Mambo bakama nge makumbo, bakazwipalulila zwiambalo bakalala pasi ne balanda babo bose bakabe bali mile ipapo bakapalula naibo zwiambalo zwabo.

Koga Jonadabe nkololo wa Shimeya, Shimeya ali nkulu wa Dafite, kabe eti, “She wangu ngabasikumbule kuti babulaya bakololo ba mambo bose, kwafa Amunoni ega. Ikoku kwakagala kwazwimisigwa ndi Abusalomu kudwa mu zhuba la Amunoni akadzula hazwadzi iye Tama.

Ngono ngwenu she wangu mambo wangu, basilonge mu moyo ndebeleko inoti bakololo ba mambo bafa bose, kwafa Amunoni ali ega.”

Koga Abusalomu katizha. Tjinyolotjo nlume we nlindi kati emilidza mesho elinga, kabona bathu banjinji bedeluka mu duthu nge zila inodwa ku Horonaimu. Nlume we nlindi kanobudza mambo eti, “Ndobona balume kulingisana ne Horonaimu pa nsupho we duthu.”

Jonadabe kadwa mambo kati, “Bonani, bakololo ba mambo baswika, sekwa kwalebgwa nge nlanda wenyu.”

Tjinyolotjo koga epedza lebeleka, bakololo ba mambo bakabe bengina, bedoroma, mambo naibobo ne balanda babo bakalila kunoshomola moyo.

Abusalomu katizhila kuna Talimayi nkololo wa Amihudi, mambo we Geshuri. Mambo Dafite bakalilila nkololo wabo zhuba ne zhuba.

Abusalomu wakatizhila ku Geshuri, kanogalako makole matatu.

Mambo Dafite bakashuba kunobona Abusalomu, ngobe bakabe batjinyaladzika ngekwe lufu gwa Amunoni.