Old Testament

Shule kwa ikoku Abusalomu kazwishakila koloyi ye ngwa ne mbizi ne balume bali makumi mashanu (50) banolabuka mbeli kukwe.

Wakabe egala emuka kutji mangwanana enoma pawunde ye zila inoyenda ku nkoba we nzinkulu. Kwakabe kuti ha nthu ezha eshokozwiyisa mbeli kwa mambo kuwozwimimila, Abusalomu wakabe en'dana ebhuzwa eti, “Unodwa ku nzi upi kene?” Ha edabila eti, “Nlanda wenyu unodwa mu gumwe ludzi gwe Iziraela,”

Abusalomu unowobe edwilila endwa eti, “Bona, ndebeleko iyo inowhika kakale yakatambunuka koga akuna nthu wakabigwa ndi mambo ungakuteedza.”

Abusalomu unowobe endwa kakale eti, “Ha ndabe ndakabigwa nsumikilisi we shango ino, mmwe ne mmwe unobe eti ezha kundili nge ndebeleko ndinshingila ndulamo.”

Kwakabe kuti ha nthu ezha kuwonthigamila, ebe embhata nge luboko gugwe emputa.

Nditjo tjakabe tjithamwa ndi Abusalomu mu nthu mmwe ne mmwe we Iziraela wakabe ezha kuna mambo kuti athamigwe ndulamo, saikoko, katola mazwiwo wose e bathu be Iziraela.

Shule kwe makole manna, Abusalomu kadwa mambo kati, “Ndokumbila yenda ku Heburoni kunoshingikadza kugadzabgwe kwandakathama ngotuna kuna Yahwe.

Nlanda wenyu wakati atjigele ku Geshuri mu Aramu, atuna nditi, ‘Ha Yahwe bangandibgwiliza ku Jerusalema, ndowothigamila Yahwe ku Heburoni.’ ”

Mambo bakandwa bakati, “Yendazo nge mbakiso.” Ndizo kabe emilika eyenda ku Heburoni.

Koga Abusalomu katuma batumwa nge kwakasumbikala mu njudzi dzose dze Iziraela kabadwa kati, “Kuti koga muwha kulila kwe lunyanga mumimile muti, ‘Abusalomu wabe mambo ku Heburoni!’ ”

Kwakabe kuna balume bali mazana mabili (200) bakabe bakokiwa ndi Abusalomu edwa nabo mu Jerusalema, bakayenda basingazibe tjimwe ngekwe gwanga gwakabe gwalukiwa.

Ngono kukati Abusalomu atjapisa zwibhayilo, katuma nthu ku nzi we Gilo kunodana Ahithofele wakabe ali mmwe we bakumbuludzi ba Mambo Dafite. Ngono ndangano ikakula, ne batobeli ba Abusalomu bakadwilila ngowanda.

Ntumwa kazha kuna Dafite kandwa kati, “Moyo ye Baiziraela yatjitendebukila kuna Abusalomu.”

Ndizo Dafite kadwa batungamili babe bose baakabe anabo ku Jerusalema kati, “Milikani titizhe, atisatizha akuna sekwa tingazwitjidza muna Abusalomu! Libilidzani! Ungadwa etiwana tjinyolotjo, ebe etithamila kwakabipa, elobesa nzi wose nge thumo.”

Ngono batungamili ba mambo bakandwa bakati, “Bonani, balanda benyu bakazwilulwamisila kuthama sekwa kumbula tetshi.”

Ndizo mambo kamilika ne be nsha uwe ne hadzasha dzidze, kuzhe kwe bakadzi be balongwana bali gumi (10) bakasala bakatjengeta ng'umba ye bushe.

Ngono mambo kabhuda akatungamila, bathu bose bakantobela, ngono bakati botjibhuda mu nzi, bakama kulingisana ne ng'umba ye bupelo.

Balanda babe bose bakapinda panli, na bose Bakhereti, na bose Bapeleti, na bose Bagiti bali mazana ali kutathatu (600) bakantobela bedwa ku Gati na ibo bakapinda mbeli kwa mambo.

Ipapo mambo kadwa Itai ntungamili we Bagiti kati, “Ini wayendabo naswi? Shanduka, usale na mambo ngobe iwe untaya, kakale untizhi wakatizha kanyi kwenyu.

Ndiko kwawakabe utjaswika madekwe, ngono apa ndikutole kakale uyendayende naswi, apa autobona kuti nami andithu aziba kwandinoyenda kene? Shanduka ne hama dzidzo, ngono ludo gwa Yahwe gusingazunguzike ne kugalikabgwe kwabo zwibe namwi.”

Koga Itai kadabila eti, “Tetshi wangu, ndotuna ne zina la Yahwe banotjila, kumwe ne kumwe kwamunoyenda ndoyenda namwi, nenguba kungabe kuli kunoyisa ku lufu.”

Ngono Dafite Kadwa Itai kati, “Pinda, uyendezo!” Ndizo Itai we N'giti kapinda ne bathu babe bose ne batjetjana bose baakabe anabo.

Shango yose ikalila, bathu bekuila pezhugwi, pakabe batobeli ba Dafite beyenda. Mambo katjuluka nkuku we Kidironi ana bathu bose bakayendila ku tjilambanyika.

Ngono bonani, Zadoki ne Balevi bose bakabe banaye bakasenga Bhokisi le Tjidumano tje Ndzimu, bakalibiga pasi, kudzina bathu bose bebhuda mu nzi, Abiathari wakabe alipo.

Ndizo mambo kadwa Zadoki kati, “Bgwiliza Bhokisi le Tjidumano tje Ndzimu ku nzi. Ha Yahwe bangama nami, limwe zhuba banowondibuza azha ndilibona kose ne bugalo gwalo.

Koga ha bangati abana tjimwe nami, kowobe kwakalulwama, bangandithama sekwabanowobe babona kwakabalulwamila.”

Mambo bakadwa Zadoki we mpirisiti bakati, “Linga, apa unobona kene? Tola nkololo uwo Ahimaazi na Jonatani nkololo wa Abiathari mubgwilile ku nzi nge kunyalala.

Bona, ndowolinda ndili panotjulukiwa kugwizi mu tjilambanyika, kuswikila ndiwana dama le zibiso lidwa ku kuli.”

Ndizo Zadoki na Abiathari bakasenga Bhokisi le Tjidumano tje Ndzimu bakabgwilila ku Jerusalema, ngono bakanogalako.

Koga Dafite katatha nge matathilo e Dombo le Mitoba, eyenda elila, etshamba nge gumbo akafuka nsholo, ne bathu bose baakabe anabo bakafuka misholo, bakatathilabo pezhugwi bali shule kukwe beyenda belila.

Kukati Dafite ebudziwa kuyi, “Ahithofele umu ndangano na Abusalomu.” Dafite kabe eti, “Imwi Yahwe shandulani gumbuludzo la Ahithofele libe bulengwe.”

Kukati Dafite eswika pezhugwi kwe dombo, pakabe Ndzimu unamatigwapo, nzwalani uwe unoyi Hushai we N'ariki unogalikabgwe kanshanganidza akapalula zwiambalo ne nsholo uwe uli zhele mavu.

Dafite kandwa kati, “Ha ungayenda nami, ungabe ntolo mundili.

Koga ha ungashandukila ku nzi, ube uswika udwa Abusalomu uti, ‘Ndowobe nlanda wenyu, imwi mambo, sekwandakabe ndili nlanda wa tate benyu ntolo, ndizo ngweno ndowobe nlanda wenyu, ndizo unonyanyaidza nkumbulo mmwe ne mmwe unowobe udusiwa ndi Ahithofele.

Bapirisiti bo Zadoki na Abiathari banowobe banawe, ubabudze tjimwe ne tjimwe tjaunowowha mu ng'umba ya mambo.

Bona, bakololo babo babili banabo ikweno, Ahimaazi nkololo wa Zadoki na Jonatani nkololo wa Abiathari unowotuma ibo kuwondibudza tjimwe ne tjimwe tjaunowobe wawha.’ ”

Ndizo Hushai nzwalani wa Dafite kangina mu nzi, nge tjibaka tjakabe Abusalomu engina mu Jerusalema.