Old Testament

Mambo Dafite kakubunganya babhayani baakabe anabo, kabashalulila balauli be bali zwiwulu (1 000) ne balauli be bali mazana (100).

Ngono Dafite kadusa babhayani kabatuma ku ngwa bali makupo matatu. Gupo limwe lakatungamigwa ndi Joabu, limwe lakatungamigwa ndi Abishayi nkololo wa Zeruya, nnung'una wa Joabu, ngono limwe lakatungamigwa ndi Itai we N'giti. Ngono mambo kadwa babhayani kati, “Namibo ndowoyendabo namwi.”

Koga babhayani bakan'dabila beti, “Imwi musiyende naswi ku ngwa. Ngobe iswi atingatizha, abangabe ne hanya naswi. Ha gwamu limwe ledu lingafa, abangabe ne hanya naswi. Ngobe imwi muli moga molizana naswi tili zwiwulu zwili gumi (10 000), kungayita ha mungatuma iswi, imwi mukasala mutitumila bhatsho muli ipapa mu nzi.”

Mambo kabadwa kati, “Ndowothama sekwa munowobe mubona kwakalulwama.” Ndizo mambo kama pa wunde ne nkoba, babhayani bose bakalongoloka bebhuda nge makupo e mazana ne e zwiwulu.

Ngono mambo kapa ndaulo Joabu na Abishayi na Itai eti, “Mu bumo gwangu musitongo whisa zogwadza nzhuzha Abusalomu.” Ngono babhayani bose bakawha mambo pabakabe bepa balauli be ngwa ndaulo ngekwa Abusalomu.

Ndizo babhayani bakayenda ku shango kunobhayana ne Baiziraela, ngwa yakagwigwa mu ishaka tje Ifureimi.

Baiziraela bakakundiwa nge babhayani ba Dafite, mu zhuba ilelo kwakabulawa balume bali zwiwulu zwili makumi mabili (20 000) mu ngwa iyeyo.

Ngwa yakaandama nge shango yose, bathu bakabulawa nge mbatsha dze ishaka bakabe banji kupinda bakabulawa nge thumo.

Ngono Abusalomu kazwiwana ashangana ne babhayani ba Dafite. Wakabe akatatha moulo iye, ngono ikangina kusi kwe nti nkulu unoyi n'oko, thabi dze nti iwoyo dzikabhata Abusalomu nge nsholo. Moulo ikatizha ikasiya Abusalomu akalembeleka mu nti makumbo ali mu phepo.

Mmwe nlume kambona ngono kabikila Joabu eti, “Ndabona Abusalomu akalembeleka mu n'oko.”

Ngono Joabu kanshandula nlume wambudza eti, “Ha wambona ini usankhukhutha kadwa awila pasi akafa. Ndabe ndingashatha kwandabe ndingakupa maloso ali gumi e siliva ne mwandabula we babhayani.”

Koga nlume kashandula Joabu eti, “Nenguba ndabe ndiyemula kuzwibona ndakabhata maloso e siliva ali tjiwulu (1 000), ndabe ndisingake alonga nkololo wa mambo luboko, ngobe kwakalebgwa tizwiwhigwa mambo emupa ndaulo imwi na Abishayi na Itai eti, ‘Mu bumo gwangu musitongo whisa zogwadza nzhuzha Abusalomu.’

Koga, nenguba ndabe ndathama bupitipiti ambulaya, akuna tjabe tjingasumbikalila mambo, nawebo wabe usingondimila.”

Joabu kabe eti, “Andingatjatjinye tjibaka nge kuko.” Ngono kabe etola mathumo matatu nge luboko gugwe, ebe enobhaya Abusalomu ndiwo mu moyo atjimpenyu pezhugwi kwe n'oko.

Bazhuzha bali gumi, basengi be zwibhayano zwa Joabu, bakabe bekomba Abusalomu benloba, bebe bembulaya.

Ndizo Joabu kalidza lunyanga, babhayani bakashanduka mu kutatana ne Baiziraela, ngobe Joabu wakabe abadziba.

Bakatola itumbu tja Abusalomu bakatjilashila mu gomba lakangina mu ishaka, bakakubunganyila mabgwe pezhugwi kukwe likabe duthu lisishoma le mabgwe. Baiziraela bose bakatizha mmwe ne mmwe kuyenda ku nzi uwe.

Mu bupenyu gwa Abusalomu wakabe azwibakila bgwe lakashongoloka mu Nkuku wa Mambo, ngobe wakabe asina nkololo ungati afa kamusa zina lile. Ndizo katumila bgwe ilelo zina lile, ngono lodang'wa Bgwe la Abusalomu na nasi.

Ipapo Ahimaazi nkololo wa Zadoki kadwa Joabu kati, “Tjima ndilabuke ndiyise thawu kuna mambo kubabudza kuti Yahwe ba baangula mu simba le zwita zwabo.”

Ngono Joabu kandwa kati, “Aunganoyisa thawu nasi, unganodziyisa limwe zhuba, koga nasi aungayise thawu, ngobe nkololo wa mambo wafa.”

Ndizo Joabu kadwa Nkhushi kati, “Yenda, unobudza mambo tjawabona.” Nkhushi kakotamisa nsholo mbeli kwa Joabu, ngono kabhuda akalabuka.

Ndizo Ahimaazi nkololo wa Zadoki kadwa Joabu kati, “Nenguba kungabeni, mundiletje ndilabuke ndili shule kwe Nkhushi uwoje.” Ngono Joabu kandwa kati, “Apa ini tjaunowobe utjilabukila nkololo wangu? Ndakalinga kuti auna mbhayilo waunowowana ngekwe thawu idzedzi.”

Ahimaazi kapapha kadwa Joabu kati, “Nenguba kungabeni, ndowolabuka.” Joabu kandwa kati, “Labuka.” Ndizo Ahimaazi kalabuka nge zila ye libala kanopindila Nkhushi.

Ipapo Dafite wakabe aligele pakati kwe mikoba mibili ye nzi. Nlume we nlindi katathila pezhugwi kwe zhalilo le nzi nge guma, kati emilidza mesho elinga kabona nlume ezha akalabuka ali ega.

Nlume we nlindi kamimila kabudza mambo, ngono mambo kadabila eti, “Apa ezha ali ega kodwa kuti wakasenga thawu dzinozipa.” Ngono kazha tjinyolotjo kasedzela pejo.

Nlume we nlindi kabona mmwe nlume kakale ezha akalabuka, ngono kadana ntjengeti we nkoba eti, “Bonani, mmwe nlume unozha akalabuka ali ega!” Mambo kashandula eti, “Na iyebo wakasenga thawu dzinozipa.”

Nlume we nlindi kabe eti, “Ndobona thambo dze we kutanga dzinga dza Ahimaazi nkololo wa Zadoki.” Mambo kashandula eti, “Nlume wakalulwama, unozha nge matama mabuya.”

Ndizo Ahimaazi kamilidza whi kati kuna mambo, “Kose kwakalulwama.” Kawapasi nge zwidwi mbeli kwa mambo kandwa kati, “Ngakukudziwe Yahwe Ndzimu wenyu, wakunda balume bakabe bakamilidzila luboko gwabo tetshi wangu mambo.”

Ngono mambo kabhuzwa kati, “Apa nzhuzha Abusalomu unomuka kene?” Ahimaazi kadabila eti, “Kwati Joabu etuma nlanda wa mambo, imi nlanda wenyu, ndakabona bhonyongo gulu kwazo, koga asizibe kuti kwakabe kulini.”

Ngono mambo kandwa kati, “Tongo tsheduka, ume ipapo.” Ndizo katendebuka kama.

Ngono bonani, Nkhushi kaswika, ngono kadwa mambo kati, “Ndamuzhila thawu dzakanaka kwazo tetshi wangu mambo! Ngobe Yahwe bamuangula nasi mu simba la bose bapanduki benyu.”

Mambo kabhuzwa Nkhushi kati, “Apa nzhuzha Abusalomu unomuka kene?” Ngono Nkhushi kadabila eti, “Dzene tshene tjanshingikalila tjingashingikalila zwita zwenyu zose, tetshi wangu, na bose banomupandukila.”

Mambo kadzipiwa nge shungu, katathila pezhugwi ku ng'umba yakabakigwa pezhugwi kwe nkoba, kayenda elila elebeleka eti, “Eke nkololo wangu Abusalomu, nkololo wangu, nkololo wangu Abusalomu! Akwabe kwafa imi mu bumo gugo, eke Abusalomu, nkololo wangu, nkololo wangu!”