Old Testament

Mushe kadana Baiziraela bose kabadwa kati, “Whililani milayo yandinoleba mu zebe dzenyu mu zhuba lino imwi Baiziraela mose, muyizwidiye mube ne njele kuyishinga.

Yahwe Ndzimu wedu bakathama tjidumano naswi mu Horebu.

Yahwe abazothama tjidumano itjetji na bobatategulu bedu, koga bakatjithama naswi iswi banotjila sangwenu mu zhuba lino.

Yahwe bakalebeleka namwi makalingisana pa dombo kudwa pakati pe moto,

imi ndili mile pakati kwa Yahwe namwi, ngoti makabe mutja ngekwe moto ngono mukasitathe dombo.” Yahwe bakabe beti,

“Ndimi Yahwe Ndzimu wenyu ibo bakamudusa mu shango ye Egipiti mu ng'umba ye busungwa.”

“ ‘Musitongobe ne mimwe midzimu mbeli kwangu.’ ”

“ ‘Musitongozwithamila zwifano zwakabezhiwa kene ifano tje tjimwe tji kudzimu pezhugwi kene tje tjimwe tjimu shango pasi kene tjimu vula pasi kwe shango.’ ”

“Musitongozwikotamila kene kuli kuzwishingila ngoti imi Yahwe Ndzimu wenyu ndi Ndzimu una fupa, ndolobela bana matjinyo a botate babo kunoti mu tjizekugwana tje butatu ne tje bunna tjinondibenga,

koga ndolakidza ludo gusingazunguzike ku zwiwulu zwe banondida kakale belondolodza milayo yangu.”

“ ‘Usitongo danila zina la Yahwe Ndzimu uwo suli, ngoti Yahwe abatowontola asina nlandu iye unodanila zina labo suli.

Londolodza zhuba le Sabata kuliyengemadza sekwa wakalayiwa ndi Yahwe Ndzimu uwo.

Mu mazhuba ali kutathatu ushinge uwidze mishingo iyo,

koga zhuba le butendeka i Sabata la Yahwe Ndzimu uwo, mulili usitongo shinga nshingo kene uli upi, iwe kene nkololo uwo, kene nkololokadzi uwo, kene nlandalume uwo, kene nlandakadzi uwo, kene ngabe iyo, kene donki iyo, kene imwe ye ng'ombe dzidzo, kene ntaya unogala nawe, kuyita kuti nlandalume ne nlandakadzi uwo anyaluluke sawe.

Ukumbule kuti wakabe uli nlanda mu shango ye Egipiti, ngono Yahwe Ndzimu uwo bakakudusa nge tjiazha tjakasima nge luboko gwakatambunuka, ndizo Yahwe Ndzimu uwo bakakulaya kulondolodza zhuba le Sabata.’ ”

“Kudza tate babo na mmeyabo Yahwe Ndzimu uwo sekwabakakudwa kuti mazhuba awo abe malefu nekuti kukuyendile zubuyanana mu shango yaunopiwa ndi Yahwe Ndzimu uwo.”

“Usitongo bulaya nthu.

“Usitongo thama bupombgwe.

“Usitongo kwiba.

“Usitongo pa butendeki gwe manyepkhwa ngekwe mbakidzani uwo.

“Usitongo yemula nkadzi we mbakidzani nawe, kene kuli kuyemula ng'umba ye mbakidzani nawe, kene nnda uwe, kene nlandalume uwe, kene nlandakadzi uwe, kene ngabe iye, kene donki iye, kene tjimwe koga tje mbakidzani uwo.”

Matama iyawa akalebgwa ndi Yahwe ku gubungano lenyu mose pa dombo kudwa pakati kwe moto mu gole ne zhalima lakati zwititi, belebeleka nge whi gulu ngono bakasitongo paphidza. Ngono bakaakwala mu zwileiti zwe mabgwe zwibili, ngono bakandipa izo.

Ngono makati muwha whi lidwa pakati kwe zhalima, dombo ilo lithuta nge moto, makazha pejo nami imwi misholo yose ye njudzi dzenyu ne bakulu benyu.

“Ngono mukabe muti, ‘Bonani, Yahwe Ndzimu wedu batilakidza tjedza tjabo ne bukulu gwabo kakale tawha whi labo lidwa pakati kwe moto, mu zhuba ilelino tabona Ndzimu ulebeleka ne nthu ngono nthu utjatjila zwe.’ ”

“ ‘Ngono ngwenu wali ini tingafa? Ngoti moto iwhoyu nkulukulu unowotitshwayila, ha tingadwilila tiwha whi la Yahwe Ndzimu wedu towofa.

Ngoti ndiyani kene pakati kwe ludzi gwe nthu wakatongo wha whi le Ndzimu unotjila ulebeleka kudwa pakati kwe moto saswi sekwa takawha ngono katjila?

Sedzela pejo uwhe kose kunowolebgwa ndi Yahwe Ndzimu wedu ube utibudza kose kunowolebgwa ndi Yahwe Ndzimu wedu kukuli, ngono towowha ngono tikakuthama.’ ”

“Ngono Yahwe bakawha matama enyu pamakabe mulebeleka nami, ngono Yahwe bakati kundili, ‘Ndawha matama e bathu ibaba abaleba kukuli, baleba zubuyanana kose ikoku kwabaleba.

Kwakanaka ha babe begala bana nkumbulo wakajali misiyose, benditja kakale belondolodza milayo yangu kuti kubayendile zubuyanana ibo ne bana babo nge kusingapele.’ ”

Yenda uswike ubadwe uti, “Bgwililani ku mishasha yenyu.”

“Koga iwe ima ipapa nami ngono ndowokubudza milayo yose yawunowobadiya kuti bayishinge mu shango yandinobapa kuti bayithuwe.”

“Ndizo ibeni ne njele kushinga sekwa madwiwa ndi Yahwe Ndzimu wenyu, musitongo pambukila ku luboko luji kene ku lumeshwe.

Muyende mu zila yamakadwiwa ndi Yahwe Ndzimu wenyu kuti ndizo mutjile ne kuti kumuyendile zubuyanana ne kuti mutjile tjibaka tjilefu mu shango yamunowothuwa.”