Old Testament

Yahwe bakadwa Mushe bakati, “Sedzedza Aroni nkulu uwo ne bakololo babe kukuli kudwa mu Baiziraela kuti bandishingile bali bapirisiti. Aroni ne bakololo babe bo Nadabu na Abihu na Eliyaza na Ithamari.

Uthamile Aroni nkulu uwo zwiambalo zwakayengemala zwinompa gudzo ne bubuya.

Ulebeleke na bose bana luzibo gwe kuthuma, ibo bandakapa bunyambi muna zwinonga izwezwi bathumile Aroni zwiambalo ayengemadzigwe nshingo wangu we bupirisiti.

Zwiambalo zwabakafanila kuthama ndiyezwi: Khiba ne efodi ne jasi ne hazu yakalukiwa ne tjiala ne mwandabula. Bathumile Aroni nkulu uwo ne bakololo babe zwiambalo zwakayengemala zwekubigwa bupirisiti kuti bandishingile bali bapirisiti.

“Bashingise matyila e mibala ye golide ne gova ne bushaba gwakashangana ne gova ne bushaba gwakabondelela ne jila buya lakakoshiwa.

“Efodi baithame nge jila lina mbala we golide ne gova ne nshaba wakashangana ne gova ne we bushaba gwakabondelela ne jila buya lakalukiwa, kuthamiwe nge bunyambi.

Ithamigwe mabhante mabili e mathudzi athumigwe mu midzibo yayo mibili kuti ibhatshanyiwe.

Ithamigwe mwandabula nge bunyambi ubhatshanyiwe nayo, uthamiwe nge matyila anofanana ne e efodi ana mbala we golide ne we gova ne nshaba wakashangana ne we gova ne bushaba gwakabondelela ne jila buya lakalukiwa.

Utole mabgwe mabili anodang'wa kuyi onikisi ukobolele mazina e bakololo ba Iziraela muali.

Ukobolele mazina abo ali matathatu mu bgwe ling'ompela, mamwe ali matathatu mu limwe, ualongolose nge kuzwagwa kwabo.

Ukobolele mazina e bakololo ba Iziraela mu mabgwe mabili se nkoboleli we mabgwana ethama. Uakombeledze nge matangana e golide.

Uanamatidze mu mabhante e efodi e mathudzi, abe mabgwe e ikumbuludzo ku bakololo ba Iziraela. Aroni asenge mazina abo mu mathudzi awe mbeli kwa Yahwe tjili ikumbuludzo.

Uthame matangana e golide,

ne misungwana mibili ye golide yakakoshiwa ube ubhatshanya misungwana iyeyi mu matangana e golide.

“Uthame tjiambalo tje pa ifuba tje kusumikilisa, tjithamiwe nge bunyambi se kwakathamiwa efodi, tjithamiwe nge jila lina mbala we golide ne we gova ne nshaba wakashangana ne gova ne bushaba gwakabondelela, utjithame nge jila buya lakalukiwa.

Tjibe tjipetiwa kabili, bulefu gwatjo gulizane ne bupabi gwatjo, bulefu gulizana kupanyalala kwe zwinyala ne bupabi gulizane kupanyalala kwe zwinyala.

Uthame mizila ili minna ye mabgwe mutjili yakatjinjika. Kube ne nzila we mabgwe anoyi sadiwusi ne mabgwe anoyi topazi ne anoyi khabunkile, uli we kutanga,

we bubili ube we mabgwe anoyi emeralidi ne anoyi safire ne teemani,

we butatu ube we mabgwe anoyi jakinti ne anoyi agate ne anoyi amethiyisiti,

we bunna ube we mabgwe anoyi beriyili ne anoyi onikisi ne anoyi jasipa. Mabgwe iyawa abhatshanyiwe nge misungwana ye golide.

Kube ne mabgwe ali gumi lina mabili (12) ana mazina e bakololo ba Iziraela ngotebedzana kwawo, ange mabgwana anotshambisa lutjwayo gwakakobolegwa muali, limwe ne limwe lina zina lakakobolegwa mu lili ali milile njudzi dzili gumi lina mbili.

Uthamile tjiambalo tje pa ifuba mitjili inonga misungo nge golide buya.

Uthamile tjiambalo tje pa ifuba zwiwheko zwe golide zwibili. Zwiwheko zwibili uzwilonge mu midzibo mibili ye tjiambalo tje pa ifuba.

Ube ulonga mitjili mibili ye golide mu milipo iyeyi mibili ye tjiambalo tje pa ifuba.

Usungilile theswi idzedzi mbili dze mitjili mu zwiwheko zwibili udzibhatshanye ne efodi tja mbeli mu mathudzi.

Uthame milipo mibili ye golide uilonge ku midzibo mibili ye tjiambalo tje pa ifuba mu ndzibo utjemukati kwatjo ku bapa ne efodi.

Uthame milipo mibili ye golide uilonge tja mbeli mu mabhante atja pasi e efodi paanoshangana ne efodi yakalukwa nge bunyambi.

Milipo ye tjiambalo tje pa ifuba isunganyiwe neye milipo ye efodi nge jila le mbala we gova, libhatane ne efodi yakalukwa nge bunyambi, tjiambalo itjetji tje ifuba tjibhatane ne efodi kuti tjiambalo tje ifuba tjisilembeleke.

Ndizo ha Aroni engina mu bugalo gwakayengemala, unowobe akaambala tjiambalo itjetji tje ifuba tje kusumikilisa tjakakwagwa mazina e njudzi dze Iziraela, tjili ikumbuludzo pana Yahwe misi yose.

Mu tjiambalo tje pa ifuba tje kusumikilisa ulonge Urimu ne Thumimu, zwibe pa moyo wa Aroni ha eyenda pana Yahwe, ndiko Aroni unowobe akasenga kusumikilisiwa kwe Baiziraela pa moyo uwe pana Yahwe misi yose.

“Tjiambalo tja kusi tje efodi utjithame nge jila le mbala we gova lose.

Tjibe ne nlomo panongina nsholo, mpeto we nlomo iwoyu udzibiwe ngolukwa kuti tjisitongo paluka.

Pasi kwatjo ku mpeto upasi utjinakise nge zwifano zwe mitjelo ye pomegiranate ye mibala ye gova ne bushaba gwakashanganyila ne gova ne bushaba gwakabondelela, uthumile tilokwana dze golide kupoteleka pakati kwe mitjelo ye pomegiranate.

Uthumile tilokwana ye golide mu mpeto we tjiambalo ube uthumila pomegiranate, ube uthumila tilokwana uthumila pomegiranate, uthame saikoko kupoteleka mpeto wose we tjiambalo.

Aroni atjiambale ha ali mu nshingo. Nsindo we tilokwana unowowhika ha engina mu bugalo gwakayengemala pana Yahwe ne ebhuda kuyita kuti asife.

“Uthame tjileitana tje golide ube ubezhela mutjili matama awa sekwa kabezhegwa mu rin'gi ye lutjwayo, ‘Kwakayengemala kuna Yahwe.’

Utjisungilile mu whutshe nge nsungwana we mbala we gova mbeli kwe whutshe.

Igale pa phazha ya Aroni. Aroni unowosenga nlandu mmwe ne mmwe ungashingikala mu zwibhayilo zwakayengemala zwinotjwayigwa Yahwe nge Baiziraela se zwipo zwakayengemala. Igale ili pa phazha iye koga kuti zwipo zwabo zwiamutjilike pana Yahwe.

“Uthame hazu yakalukiwa ye zwikotji nge jila buya ube uthama whutshe nge jila buya ne mwandabula wakalukwa nge nnali.

“Bakololo ba Aroni ubathumile hazu ne mimwandabula ne whutshe kuti babe ne ntutshi ne gudzo.

Zwiambalo izwezwi uzwiambadze Aroni ne bakololo babe, ubayengemadze ubazhodze kundishingila bali bapirisiti.

Ubathumile zwiambalo zwa kusi zwibafukidze kusi zwidwile pa thunji zwinopelela pa zwidzwa.

Aroni ne bakololo babe bazwiambale ha bengina mu nshasha we bushanganilo kene bezha pejo ne tjibeso tjinopisigwa zwibhayilo mu bugalo gwakayengemala, kuti basitongo dwa bezwiwana babe nlandu bedwa befa. Iwoyu ube nlayo usingapele kuna Aroni ne zwizekugwana zwizwe.”