Old Testament

Ngono nge butala gwe gova ne bushaba gwakatundubala ne bushaba gwakabondelela bakathama zwiambalo zwakathamiwa nge bunyambi zwinoshingisiwa mu bugalo gwakayengemala, bakathamila Aroni zwiambalo zwakayengemala Yahwe sekwa bakadwa Mushe.

Ngono kathama efodi ye golide, butala gwe gova, bushaba gwakabondelela, bushaba gwakatundubala, ne jila lakalukwa zwakanaka.

Ngono bakathula golide kuti ibe ndelundelu, bakaitjeka ikabe thetjanana, bakailukila mu butala gwe gova ne mu bushaba gwakabondelela ne mu bushaba gwakatundubala ne mu jila lakalukwa zwakanaka, nge ntjeko we bunyambi.

Bakathamila efodi mitjijana kuibhatshanya ne midzibo yayo mibili.

Ngono mwandabula wakalukwa zwakanaka wakabhatshanyiwa ne efodi ukasungigwa muili kuli jila ling'ompela lakathamwa nge bunyambi nge golide ne butala gwe gova ne bushaba gwakabondelela ne bushaba gwakatundubala Mushe sekwa akadwiwa ndi Yahwe.

Ndizo kathama mabgwe e onikisi akanamatidziwa mu golide, akabe akakobogwa nkwalo we tjilakidzilo, kuyendidzana ne mazina e bakololo be Iziraela.

Kaabiga mu mitjijana ye mathudzi e efodi, kuti abe mabgwe e tjikumbuludzo tje bakololo be Iziraela Mushe sekwa akadwiwa ndi Yahwe.

Kathama tjiambalo tje ifuba nge bunyambi sekwa kwakathamiwa efodi nge golide ne butala gwe gova ne bushaba gwakabondelela ne bushaba gwakatundubala ne jila lakalukwa kwakanaka.

Tjakabe tjakalizalizana midzibo yose bunna gwatjo, tjiambalo tje ifuba tjakabe tjakapetiwa kabili, tjakabhatshanyiwa nge bulefu tjibuya tjibhatshanyiwa nge bupabi ha tjipetiwa kabili.

Bakathama mizila minna ye mabgwe mutjili. Nzila we mabgwana e sadiwusi ne e topazi ne khabhuniki kuli nzila we kutanga.

Nzila we bubili uli we mabgwana e emeraledi ne safire ne e dayimani,

nzila we butatu uli we mabgwana e jakinti ne e agate ne amethiyisiti,

nzila we bunna uli we mabwana e dayimani ne e onikisi ne jasiperi, mabgwana akabe akanamatidziwa mu golide.

Akabe ali mabgwana ali gumi lina kubili (12) kuyendidzana nge mazina e bakololo be Iziraela, akabe enga rin'gi ye tjitshambiso, limwe ne limwe lakakobogwa zina lalo mu mazina e njudzi dzili gumi lina mbili (12).

Ngono mu tjiambalo tje ifuba bakathama ketani yakanaka inonga misungo ye golide mbuyanana.

Bakathama zwinonamatidza zwili zwibili zwe golide ne milipo mibili ye golide, bakalonga milipo mibili mu phelelo mbili dze tjiambalo tje ifuba,

ngono bakalonga ketani mibili dze golide mu milipo mibili ku phelelo dze tjiambalo tje ifuba.

Ngono bakasungila phelelo dze misungo mibili mu zwinamatidziwa zwibili zwabakabe banamatidza mbeli kwe mathudzi e efodi.

Ndizo bakathama milipo mibili ye golide, bakailonga ku phelelo mbili dze tjiambalo tje ifuba, mukati kwatjinopelela pejo ne efodi.

Bakathama milipo mibili ye golide kakale, bakailonga mbeli tja pasi kwe mathudzi e efodi, pejo ne mpeto pezhugwi kwe mwandabula wakalukwa kwakanaka we efodi.

Bakasungila tjiambalo tje ifuba nge milipo yatjo mu milipo ye efodi nge nsungo ntala gwe gova, kuti tjinamatile pezhugwi kwe bhante lakalukwa nge bunyambi le efodi, ne kuti tjiambalo tje ifuba tjisitongo nyeba tjikasununguka mu efodi sekwa kadwiwa Mushe ndi Yahwe.

Kakale kathama hazu ye efodi yakalukwa yose nge butala gwe gova.

Ntshibha we hazu wakabe unga ntshibha umu tjiambalo, wakatendeledziwa nge nluko wakathumigwa kuudziba mu kupaluka.

Pasi kwe mathudzi e hazu bakathama dzipomegiranate nge butala gwe gova ne bushaba gwakabondelela ne bushaba gwakatundubala ne jila lakalukwa kwakanaka.

Kakale bakathama tilokwana nge golide mbuyanana, bebe belonga tilokwana pakati kwe dzipomegiranate pezhugwi kwe mathudzi e hazu kuipoteleka, dzili pakati kwe dzipomegiranate.

Belonga tilokwana ne pomegiranate, belonga tilokwana ne pomegiranate kupoteleka pasi kwe mathudzi e hazu, ili hazu ye kushingisiwa sekwa kadwiwa Mushe ndi Yahwe.

Kakale bakathamila Aroni ne bakololo babe zwiambalo zwe jila zwakalukwa kwakanaka,

ne whutshe ye jila lakanaka, ne dzimwe whutshe dze jila lakanaka ne marukhwi e jila lakanaka lakakoshiwa,

ne mwandabula we jila lakanaka lakakoshiwa nge butala gwe gova ne bushaba gwakabondelela ne bushaba gwakatundubala gwakalukigwa ngothumigwa sekwa kadwiwa Mushe ndi Yahwe.

Bakathama tjiala tje ndilo tjakayengemala nge golide mbuyanana, bakakwala pezhugwi kwatjo nge nkwalo unonga kubezhegwa kwe ring'i ye lutjwayo, “Kwakayengemala kuna Yahwe.”

Bakatjisunga nge nsungo we butala gwe gova, kuti batjisungile pezhugwi kwe whutshe, sekwa kadwiwa Mushe ndi Yahwe.

Nshingo wose we bugalo gwe Ndzimu, we nshasha we bushanganilo wakawidziwa nge zila iyeyi. Ngono bathu be Iziraela bakathama kuyendidzana ne sekwa kadwiwa Mushe ndi Yahwe.

Bakazhisa bugalo gwe Ndzimu kuna Mushe, nshasha ne zwija zwayo zose, zwiwheko ne mbakililo dzawo ne mbalilo dzawo ne phanda dzayo ne zwigadziko zwawo,

ne makukuta e pkhwizi akatakiwa bushaba ne e mbudzi akasukiwa anofukidza ne tjisitilo tje nkoba

ne bhokisi le butendeki ne mapango anolisenga ne tjigalo tje ngoni,

ne tafuli ne zwija zwayo zose ne tjiwunga tje Ndzimu

ne tjigadziko tje luvone tje golide mbuyanana ne mavone atjo ne zwija zwatjo zose ne mafuta e mavone

ne tjibeso tjinopisigwa zwibhayilo tje golide ne mafuta anozhodziwa ne motsha unonuwha zwinozipa ne zwisitilo zwe nkoba we nshasha

ne tjibeso tjinopisigwa zwibhayilo tje phangula ne sefo ye phangula ne mapango atjo ne zwija zwatjo zose ne bhavu linongulila ne tjigadziko tjatjo,

zwisitilo zwe nsha ne mapango awo ne zwigadziko zwawo, zwisitilo zwe nsha ne tjisitilo tje nkoba ne misungo yawo ne mbambo dzawo ne zwija zose zwinoshingisiwa mu bugalo gwe Ndzimu, zwe nshasha we bushanganilo,

zwiambalo zwakalukwa kwakanaka zwinoshingisiwa mu bugalo gwakayengemala ne zwiambalo zwakayengemala zwa Aroni we mpirisiti ne zwe bakololo babe zwabanoshingisa bali bapirisiti.

Bathu be Iziraela bakathama nshingo wose kuyendidzana ne sekwa kadwiwa Mushe ndi Yahwe.

Ngono Mushe kabona nshingo wose, ngono bonani, bakauthama sekwa kalaula Yahwe, ndizo bakauthama. Ngono Mushe kabakombolela.